狗狗出車守則

正值暑假，相信好多狗主都會趁機帶狗狗出去玩下。難得出去玩當然想帶狗狗去遠啲嘅地方啦～但出車對狗狗黎講其實好驚架！狗狗咁驚嘅情況之下，狗主到底點先幫到佢呢？

1. 減慢車速
   對狗狗黎講，搭車最恐怖嘅地方在於車嘅速度快～尤其對第一次搭車嘅狗狗黎講，搭車更加有如坐過山車一樣>_<所以如果情況許可，狗主最好可以喺開車初期減慢行車車速，俾時間狗狗適應～

2. 設小休時間
   狗狗平時少搭車，所以佢地好易會暈車浪～建議狗主如果想帶狗狗去啲搭好耐車先去到嘅地方，中途要分段俾狗狗落車抖抖氣，舒緩佢地緊張嘅心情同不適。

3. 調低車廂冷氣溫度
   狗狗嘅體溫係會隨住佢地嘅心情而改變架！對狗狗黎講，搭車係一件好令佢地緊張同不安嘅事情，而緊張同不安感會令狗狗嘅體溫上升。如果狗主可以開大啲冷氣，就可以舒緩到狗狗因為體溫上升而引起嘅不適啦～

除左以上幾個要點之外，最重要嘅係狗主嘅陪伴～狗主係狗狗最大嘅依靠同安慰。如果行車嘅時侯，狗主可以陪喺狗狗身邊，即時安撫佢地，幫佢地穩定情緒，狗狗一定會安心啲～玩都玩得開心啲！：）

狗狗護齒產品有認證

聽過無數朋友介紹過唔同嘅狗狗護齒奇招，但係邊個最可信？！有時都係估估下？！

畀啲TIPS大家，今次想同大家介紹個好有來頭嘅機構VOHC 國際獸醫牙齒保健委員會 (The Veterinary Oral Health Council)！！！VOHC由世界各地嘅專業獸醫同牙齒專家創辦，專門認證貓狗口腔護理產品。只有經過嚴謹驗證，能夠有效減少牙菌斑或牙結石嘅產品，先可以獲得認證。所以狗主們記得認住佢地個LOGO，咁就確保自己買到有效可靠嘅狗狗護齒產品啦！

通常通過認證嘅產品都會係包裝上面有呢個LOGO架

以下係VOHC認證的狗狗護齒產品，有咗個list，就可以放心畀狗狗用啦！

(資料來源：http://www.vohc.org/accepted_products.htm)

美味狗狗潔齒骨

狗狗每日食野，牙齒都會積聚一啲牙垢，如果太耐唔處理就會有細菌，出現口腔問題。所以狗狗都要刷牙架！用潔齒骨或者潔齒餅就最方便喇！仲可以食得落肚添！

狗主只要花啲心思，就可以整到潔齒餅架啦！睇睇下面個食譜同做法啦！

材料：

黑糖： 50 克 檸檬皮： 適量 低筋麵粉： 200 克

泡打粉： 1 小匙 全麥麵粉： 100 克 蛋： 2 個

製作方法：

• 將蛋、黑糖、檸檬皮攪拌均勻
• 將低筋麵粉、全麥麵粉、泡打粉混合過篩
• 將(1)同(2)混合，攪拌成麵團
• 將麵團搓成長條狀，大約3cm厚度
• 放入焗爐，用160°C，焗30分鐘
• 拎出黎，趁熱切成2cm嘅薄片
• 再放入焗爐，用130°C焗20分鐘
• 再翻轉焗12分鐘，咁就完成啦！^_^

忙碌嘅狗主，如果冇時間自己整，又或者擔心自己整得唔夠好(太軟或者太硬會影響潔齒效果架)；狗主都可以買潔齒骨畀狗狗用架！潔齒骨揀邊隻好？有啲牌子嘅潔齒骨係經過VOHC (The Veterinary Oral Health Council)認證架，VOHC係國際獸醫牙齒保健委員會。聰明嘅你一定識揀啦！

不可不知 狗狗沖涼NO！

每日幫狗狗沖涼就係乾淨，就係好？答案：NO！

狗狗同人類係唔同架！因為狗狗嘅皮膚唔會咁容易出汗，所以狗狗係唔需要成日沖涼架。狗狗嘅沖涼次數可以根據季節同身上嘅潔淨程度而決定。通常冬天每個月先沖一次架咋！春天同秋天就每隔10日度沖涼一次，夏季就每星期一次。咁就已經足夠喇！

提示：係某啲情況底下，狗主千其唔好幫狗狗沖涼呀！ NO！NO！

• 幫未打過疫苗嘅狗狗沖涼NO！

尤其係狗BB，因為冇打過疫苗嘅狗狗抵抗力低，如果沖涼之後會好容易感冒。啱啱打完疫苗嘅狗狗，一個星期之內都係唔可以沖涼架！

• 幫有外傷嘅狗狗沖涼NO！

狗狗受傷之後或者係手術後都唔可以沖涼架，狗狗身上面有傷口，沖涼掂到水，會令傷口發炎架！

• 幫患病嘅狗狗沖涼NO！

狗狗患病期間唔適合沖涼，當狗狗體質弱，幫狗狗沖涼會容易引發低血壓，發生休克架！>_<

• 幫劇烈運動後嘅狗狗沖涼NO！

狗狗做完劇烈運動，血液會停留係四肢、肌肉。如果即刻幫狗狗沖涼，會令狗狗嘅血液會停留係皮膚，引致心臟同大腦供血不足，會影響狗狗健康架。

• 幫啱啱吃飽嘅狗狗沖涼NO！

如果狗狗啱啱吃飽飽就沖涼，狗狗嘅皮膚血管會擴張，只有少量的血液流去胃部，會引起狗狗消化不良同血糖降低，狗狗會容易覺得暈架！

狗狗沖涼3大Step

每次幫狗狗沖涼都要絞盡腦汁，諗計仔~ 點先可以令狗狗乖乖地沖涼？有幾個幫狗狗沖涼嘅步驟，可以幫狗狗沖得開心，狗主又處理得輕鬆！

Step 1 沖涼之前

• 狗主可以幫狗狗梳返順啲毛。唔好睇小呢個簡單嘅動作，梳毛可以清除毛球、毛結，帶走狗毛表面嘅汙糟野架。
• 係狗狗耳洞塞入棉花，防止耳仔入水而導致中耳炎。

 

Step 2 沖緊涼

• 幫狗狗沖涼原來都要有次序架！係浴缸注入35°C左右嘅暖水，畀狗狗企入去，由尾部開始淋遍全身。
• 然後可以加啲沐浴液，係狗狗身上起泡，搓均全身。之後就可以沖走狗狗身上嘅泡泡啦！

Step 3 沖完涼 ^_^

• 狗狗沖完涼全身濕淋淋，自然會 Fing 乾身上嘅水，唔想成身濕曬？ 呢個時候狗主要準備定大毛巾，幫狗狗擦乾身！
• 唔想狗狗冷親，用風筒就得啦！最後，記住拎返狗狗耳仔入面嘅棉花出黎呀！

狗狗修甲唔扭計

狗狗同人一樣都要定期剪指甲架！ 如果長時間冇幫狗狗剪指甲，唔單止會影響狗狗行路；有時指甲太長仲會刺到肉墊添呀 (身為狗主一定好心痛喇 >_<)

但係，要狗狗坐定定比你剪指甲真係唔容易， 佢地會好驚同避開架！ 究竟點樣剪先可以令狗狗唔扭計呀？有好多疑問呀？？？

• 幾耐要幫狗狗剪一次指甲？

其實狗狗同人類嘅指甲生長速度唔同，大概7至10日就要剪一次指甲喇。

• 用普通嘅剪刀得唔得呀？

狗狗嘅指甲好堅硬，形狀都好特別，用一般嘅剪刀係好容易整親狗狗架。所以一定要用狗狗專用嘅剪刀。

• 剪邊啲位先啱呀？

記住記住， 幫狗狗修剪指甲之前，一定要睇清楚！！！狗狗指甲嘅顏色比較深，而且係連住血管架， 見到係半透明嘅部分先至好剪呀！ 如果唔小心剪到血管，唔單止會令狗狗指甲出血、痛楚，仲會令狗狗對剪指甲好抗拒架！

• 剪到狗狗流血點算好？

萬一唔小心剪到血管，而有流血嘅情形發生，要盡快幫狗狗止左血先，同一時間要安撫狗狗情緒呀！

• 點樣做可以令狗狗放心畀人剪指甲呀？

幫細膽嘅狗狗剪指甲嘅時候，佢會好驚架！狗主平時可以多啲觸摸狗狗嘅爪，改變狗狗對爪嘅保護意識。又可以將狗狗用嘅指甲剪刀放係狗狗可以見到嘅地方。當狗狗習慣左畀人觸摸指甲，對指甲剪刀又唔陌生，之後再幫狗狗剪指甲自然冇難度啦！

狗狗剃毛後遺症

00

每到夏天，好多主人都會幫狗狗剪短啲毛，等狗狗可以清清爽爽過夏天。但對於一啲對自己嘅毛毛有情意結嘅狗狗黎講，剪毛係佢地最大嘅惡夢，甚至會令佢地有負面嘅心理反應，呢個時候主人們應該點應對呢？

面對生氣嘅狗狗
狗狗：「拿！我都唔想發你脾氣架，鬼叫你想搶走我身上嘅毛毛咩！如果你堅決要剪我啲毛毛，我地反面架！我攻擊你架！」

應對方法：如果主人真係覺得狗狗好需要剪毛，但又唔想傷害自己同狗狗嘅感情，我地建議你帶狗狗去搵專業寵物美容師。一來佢地經驗豐富，識得處理狗狗因為剃毛而產生嘅急躁情況，二來你隻狗狗亦唔會遷怒於你。

面對心情鬱悶嘅狗狗
狗狗：「冇哂啲毛喇…你俾我柄埋一邊啦，我唔會再出街見人架喇…」

應對方法：如果主人發現自己嘅狗狗剪哂啲毛之後接受唔到自己，情緒低落，咁下次剪毛嘅時候就要留意，唔好剪得太短喇！當然啦，如果佢真係唔願意出街嘅，唔好夾硬迫佢。其實狗狗嘅毛毛長得好快，相信幾日之後佢嘅情緒就會好番啲！

面對自卑嘅狗狗
狗狗：「媽呀！我咁醜樣…以後仲點見人喎 /_\ 我冇朋友架喇…大家都會睇唔起我唔鍾意我…」

應對方法：面對自卑嘅狗狗，主人要多啲摸下狗狗，安慰佢～最好就讚佢多啲，話俾佢知佢有幾靚幾可愛啦！雖然狗狗未必完全聽到明主人講咩，但你鐘唔鐘意佢，欣唔欣賞佢，佢係會知架！所以平日唔好吝嗇對狗狗嘅讚美，要幫佢從中建立自信心～！

你係咪一個合格嘅狗主？

經常都聽到唔同嘅大人小朋友講「狗狗好得意呀～我好想養狗呀！」但鐘意還鐘意，其實養狗係一門好大嘅學問黎架！唔止需要有耐性同愛心，養狗仲需要好多條件配合架。各位主人～而家就等我地一齊黎做個自我評估，睇下大家合唔合格啦！

1.屋企夠唔夠大？
好多人誤會左屋企夠大係養狗嘅首要條件，其實呢樣野唔係必然架！屋企得五六百呎唔代表你係差嘅主人，而屋企過千呎亦唔代表你係一個好好嘅主人喎！最重要嘅係養左狗狗之後，一定要成日帶佢去寬敞嘅戶外活動，俾佢有足夠嘅伸展！呢樣野絕對係重要過屋企大唔大架～

2. 有冇時間陪狗狗？
同湊小朋友一樣，養狗狗係需要付出時間同心血架！狗狗係主人生活中嘅同伴同依靠，主人千祈唔好因為工時長就唔理狗狗呀！

3. 屋企人相處融唔融洽？
狗狗係屋企嘅一份子，養狗係需要一家人共同承擔責任架！除左照顧狗狗日常生活所需，其實俾一個和諧嘅生活環境佢都好重要～如果屋企日日鬧交，對狗狗黎講其實都唔係一個好嘅成長環境>_<

5. 會唔會成日搬屋？
好多主人都冇考慮過呢個問題。雖然狗狗同貓貓唔同，對環境嘅依賴性相對較低，但當搬到一個新嘅環境，狗狗都會覺得陌生同不安架！偶然搬一次屋當然冇問題啦～但如果成日搬屋，就要考慮下為狗狗定落黎喇！>_<

危險狗食排行榜「下」

飯後剩餘骨頭（危險程度：六粒星） 好多人一諗起狗狗，就會聯想起佢地嘅食物──骨頭。無錯呀～狗狗的確好鍾意咬骨頭，而咬骨亦可以幫狗狗護齒。但係，唔係所有骨都啱狗狗食架！就例如我地平時食完飯剩番嘅碎骨咁～狗狗食左嘅分分鐘會窒息架！

果核（危險程度：七粒星） 好多生果都含大量果糖，唔適合狗狗食用。但原來最最最唔適合狗狗食用、最危險嘅係生果……入面粒核呀！硬嘅果核除左會哽親狗狗，會阻塞狗狗腸道，引致狗狗小腸發炎。某啲果核仲含有氰化物，可能會引致狗狗呼吸困難、瞳孔放大、甚至休克添架！

提子乾（危險程度：八粒星） 要切記：生果雖然有益，但唔係所有寵物都啱食架！喺美國，每年就有大約10隻狗狗因為食提子／提子乾而中毒並導致腎衰竭！雖然箇中原因獸醫仲未確定到～但後果可以好嚴重架 >_<

洋蔥／大蒜（危險程度：九粒星） 洋蔥同大蒜含有大量二硫化物，會破壞狗狗嘅紅血球。就算只係一小片洋蔥又或者一粒大蒜，已經足以阻礙狗狗紅血球嘅運作，影響輸氣量同狗狗身體嘅氧氣量。食用過量嘅話更加會造成狗狗溶血性貧血添！(Source: http://sanimaldise.nvri.gov.tw/fmodule/Disease.aspx?DiseaseID=82hzZe%2F1Dhs%3D)

朱古力（危險程度：十粒星！！！） 市面上嘅朱古力大部份都含有咖啡因同可可鹼嘅成份，人類食用當然冇問題啦！但對狗狗黎講，呢啲成份同毒藥係冇分別架！除左會減少狗狗輸送去腦部嘅血液流量，仲會威脅到狗狗嘅心臟同中樞神經系統，對狗狗有致命性嘅影響。鍾意食朱古力嘅主人們，記住要收好自己嘅朱古力，唔好俾狗狗放入口呀！

唔係所有野食都啱狗狗食用架！想小狗健健康康、長命百歲就記住要留意狗狗嘅飲食，係適當嘅時候向充滿誘惑嘅美食Say NO喇～

危險狗食排行榜「上」

牛奶（危險程度：一粒星） 細個睇卡通片總會見到貓貓狗狗飲奶嘅場面，但原來好多狗狗都患有乳糖不耐症，唔適宜飲奶架！俾狗狗飲牛奶雖然未至於會對佢地嘅生命構成威脅，但有可能會令佢地出現腹瀉、脫水，又或者皮膚敏感、發炎等徵狀。到時就辛苦狗狗喇！

肝臟（危險程度：兩粒星） 肝臟係含高維他命A嘅食物，少量食用已經足夠幫狗狗補充身體所需嘅維他命A。但主人要切記：一個星期千祈唔好俾狗狗食多過兩個雞肝呀！否則就會引發骨骼問題，狗狗仲有可能會出現厭食徵狀添！

木糖醇成份嘅糖果（危險程度：三粒星） 好多主人都知道狗狗唔食得朱古力，但除左朱古力之外，狗狗連糖都唔食得架！市面上好多糖都添加左木糖醇嘅成份，而木糖醇會增加狗狗體內嘅胰島素、降低血糖。狗狗食左唔單止會嘔，仲有可能會有癲癇反應添！

酒精飲品（危險程度：四粒星） 酒精飲品嘅主要成份係乙醇，過量攝取唔止會醉，仲會令狗狗中酒精毒添！中左酒精毒嘅狗狗唔單止行唔到直線，仲會尿量急增，呼吸率減慢。主人千祈唔好覺得狗狗飲少少冇問題～狗狗身型細我地咁多，就算飲左好少量都會對狗狗嘅身體有極大嘅影響架！唔好試呀！

咖啡（危險程度：五粒星） 明白嘅，狗狗由朝訓到晚有時真係會令主人非常妒嫉！但係千祈唔好用咖啡幫狗狗提神呀！因為咖啡當中含有一種叫甲基黃嘌呤嘅興奮劑，飲左會刺激到狗狗嘅神經系統，令到狗狗嘔、躁動，甚至心悸。