狗狗維他命指南

現代人愈黎愈睇重養生，好多人臨訓前都會啪粒維他命丸幫自己補充營養。但狗狗唔同我地人類，唔可以成日食藥物去補充身體營養所需。今次就想同大家講解一下狗狗到底需要啲咩維他命，而呢啲營養我地又可以點用食物幫狗狗正確咁攝取到啦：）

維他命A

狗狗如果吸收得太少維他命A，就會有機會患上夜盲症。到時一入夜狗狗就會撞黎撞去不斷整親自己，諗起都心痛呀>_<

維他命A至營食品：牛奶、蛋、肝臟

維他命B

狗狗吸收得唔夠維他命B係非非非常嚴重架！！狗狗除左會嘔同暈之外，仲有可能會患上結膜炎又或者性器官發育不全，再嚴重啲仲可能會導致心臟衰竭，有生命危險添！

維他命B至營食品：薯仔、麵包、意大利粉

維他命C

維他命C可以幫狗狗加強佢地骨骼嘅柔軟度，減輕狗狗機能老化嘅徵狀。想狗狗身體夠fit，主人記住為狗狗提供足夠嘅維他命C呀～

維他命C至營食品：青椒、蘿蔔、椰菜花

維他命D

維他命D對狗狗好重要！有幾重要？佢除左提供養份俾狗狗骨骼生長之外，仲可以幫狗狗預防佝僂病添！相反，如果狗狗缺乏維他命D，雌性嘅狗狗可能生唔到bb架！

維他命D至營食品：肉類、無糖乳酪、魚

吸收到足夠嘅營養，狗狗先可以健康成長。不過主人要記住：攝取過量都會對狗狗嘅身體造成傷害。所以補還補，千祈唔好補過龍呀～！

狗狗身體語言知多少

雖然主人每日都會見到狗狗，但其實狗狗每個動作背後嘅意義你地又知幾多呢？今日就黎一個小測驗，睇下各位主人對狗狗每個動作嘅認識有幾深啦！

1. 狗狗嗅草地代表牠對附近環境……
   表示擔心 b. 沒有惡意   c. 表示憂慮    d. 帶有惡意
2. 狗狗搔癢代表牠……
   只是身體痕癢而已 b. 感到生氣   c. 感到緊張   d. 有睡意
3. 狗狗打噴嚏代表牠……
   感到焦慮 b. 生病了   c. 帶有惡意   d. 需要主人關心
4. 狗狗不斷轉圈圈代表牠……
   要去大便 b. 坐立不安   c. 極具攻擊性   d. 想到户外活動一下
5. 狗狗前半身伏下、 屁股提起代表牠……
   肚子不舒服 b. 要去尿尿   c. 身體痕癢   d. 想要邀請你一起玩遊戲
6. 狗狗身體突然變僵硬代表牠……
   想要冷靜下來 b. 身體不適   c. 抗拒面前的人   d. 想要吃東西
7. 狗狗舒展身體代表牠……
   睡了太久 b. 感到不安   c. 想要跟主人玩   d. 想洗澡了

答案：1b 2c 3a 4a 5d 6c 7b

由於狗狗唔識用語言同人類溝通，主人想了解狗狗嘅內心世界就一定要從佢地嘅身體語言入手～如果主人你答啱哂以上７題嘅話，恭喜你！你好了解狗狗！而有錯漏嘅主人亦都唔需要太介意，只要你由今日開始多啲留意狗狗嘅動作同佢地想表達嘅意思，相信你同狗狗嘅溝通一定會愈做愈好！大家一齊加油啦～

狗狗換牙期家中必備

同我地人類一樣，狗狗都會換牙架～不過佢地嘅換牙期俾我地早，狗狗多數都係四到六個月左右就會開始甩牙架喇～咁狗狗換牙嘅時侯，我地作為主人又要準備啲咩呢？

1. 磨牙玩具
   換牙期間，狗狗會牙仔痕。如果搵唔到適當嘅渠道發洩，主人嘅衫褲鞋襪同傢俬就好容易會遭殃架喇>_< 所以主人應該喺狗狗兩個月大嘅時侯，開始着手幫佢準備定一啲磨牙玩具又或者狗咬骨膠，幫狗狗喺換牙期前準備定磨牙用品。
2. 冰鎮毛巾
   你冇睇錯～唔係冰鎮飲品，係冰鎮毛巾！！點解？因為換牙期間嘅狗狗唔止會牙仔痕，仲會牙痛添！狗狗咁辛苦，主人唯一可以做嘅就係搵一條毛巾，整濕佢再放入雪櫃冰鎮～到狗狗牙仔唔舒服嘅時候拎出黎俾狗狗咬！唔好睇小條凍毛巾呀～佢可以起到好好嘅止痛效果架：）
3. 補鈣食品
   個個主人都想狗狗健健康康，如果你地想狗狗喺換牙時期換到堅固而健康嘅牙齒，咁主人就要記住幫狗狗適量補鈣喇！喺度建議番主人們～可以嘅話儘量用食物幫狗狗補鈣，唔好俾藥佢食。除左奶類製品之外，餵狗狗食豆製品、蝦皮同魚肉等等都可以幫佢補充鈣質架：）

狗狗應節美食– 冰皮月餅

上次教過大家整狗狗都食得嘅傳統月餅，結果好多主人反映「天氣咁熱，我地都變哂食冰皮月餅啦～」哎呀～好啦好啦！今次就教大家整in啲嘅冰皮月餅啦！

要準備嘅材料包括：

冰皮粉            50g
葡萄糖            10g
士多啤梨        60g
蕃薯                150g
蜜糖                ½ 茶匙
粟粉                適量
脫脂奶            50g

準備好我地就可以即刻開始喇！

1. 將60g士多啤梨放入攬拌機，加入½ 茶匙蜜糖後加以攬拌。
2. 將攬拌好嘅果醬用中火煮至濃稠，再放入雪櫃冷藏5-6小時。
3. 將蕃薯去皮煮15分鐘，隔水後壓成蕃薯蓉，分成8均份。
4. 將粟粉炒至微黃色。
5. 用手拌勻冰皮粉同葡萄糖，拌勻同時加入脫脂奶搓成冰皮粉團，分成8均份。
6. 用蕃薯蓉包好果醬，搓成球狀。
7. 用冰皮包裹蕃薯蓉球，撲上粟粉，再用月餅模定型。

大個仔！要換牙喇～

雖然成日都話狗狗同我地人類好似，一樣要刷牙，一樣會有牙周疾病！同我地人類唔同嘅係，狗狗唔需要等到六七歲，佢地三四個月大就會開始甩牙換牙架喇～

出牙期

出世20日：狗狗開始出牙仔

4至6星期：狗狗出齊門牙

兩個月大：乳齒全部出齊！當中包括門齒、犬齒同前臼齒，全數28隻牙仔～而牙仔呈奶白色，細細粒，相對較尖。

換牙期

4個月：狗狗開始甩門牙

8個月～２歲：狗狗嘅乳齒換哂做恆齒～全數42隻！

主人千祈唔好以為狗狗健健康康出齊牙，換好哂恆齒就冇手尾跟呀！我地依然要錫住狗狗，關注佢嘅口腔健康，如果唔係將來患有牙周疾病就大件事喇！想狗狗嘅牙齒健健康康，就記住關注我地，緊貼狗狗牙齒健康資訊喇～下次見：）

狗狗腸胃調理有妙法

為食係狗狗嘅天性～好多主人因為太鍚狗狗就由得佢地不停食，但原來咁唔單止會令狗狗變肥過重，仲有可能會搞到狗狗腸胃變差，消化不良。今次就等我地一齊睇下狗狗3大腸胃問題，再睇下主人可以做啲咩幫狗狗調理啦！

1. 肚痾
   如果狗狗平日攝取左過多嘅油份，好容易就會肚痾架喇，嚴重嘅話仲會出現脫水徵狀添！所以當狗狗開始痾軟性大便，主人就要多加注意，唔好再俾狗狗食咁多油膩嘅食物喇！
2. 便秘
   就好似我地一樣，狗狗都會有排便唔暢通嘅問題架！如果主人留意到狗狗排便次數突然減少，又或者便便變得異常乾硬，令狗狗有排便嘅困難，咁主人就應該少啲俾狗狗食骨頭喇！因為狗狗雖然咬得爛骨頭，但其實佢消化唔到架！相反，主人可以俾高溶解度嘅潔齒骨狗狗食，咁就可以既清潔到牙仔，又唔會傷害到狗狗嘅腸胃健康啦～
3. 食慾不振
   如果平日貪食嘅狗狗牙仔冇事，但又突然開始唔想食野，主人就要留意下狗狗，睇下佢係唔係有咩事喇～因為狗狗可能係腸胃唔舒服！呢個時侯，主人可以餵多啲蔬菜或者水果俾狗狗食，等佢地食清淡啲，幫佢地調理番腸胃～

狗狗應節美食– 中秋蕃薯月餅

就快到中秋，相信唔少主人都想俾狗狗感受節日氣氛～講到中秋節，我地又點可以唔提起最正嘅應節食品──月餅呢？！你都想同狗狗食住月餅賞月？ 咁就要整自家製月餅，同狗狗一齊開心迎中秋啦～

請準備以下材料：

– 低筋麵粉    100g

– 橄欖油        40g

– 蛋黃汁        少許

– 蕃薯             幾個

– 紅蘿蔔 一個

準備好材料，主人們就可以開始跟住以下步驟着手整喇～

1. 將低筋麵粉同橄欖油攪拌勻，搓成月餅皮。
2. 將蕃薯煮熟，再壓成蕃薯蓉。
3. 將紅蘿蔔稍微煮熟，切成粒狀。
4. 用蕃薯蓉包住紅蘿蔔粒。
5. 喺蕃薯蓉外層包上月餅皮，放入月餅模型，壓出月餅形狀。
6. 將焗爐預熱至攝氏180度。
7. 於月餅皮面噴水，放入攝氏170度嘅焗爐焗5分鐘。
8. 拎出月餅，喺表面掃上蛋黃汁。
9. 將月餅放入攝氏160度嘅焗爐，等月餅表面焗至金黃色就可以拎出黎喇～

狗狗Massage大法

「你有壓力，我有壓力！」其實狗狗都有壓力架！雖然睇起上黎，狗狗好似日日都只係需要訓同食咁，但原來佢地都有壓力來源架～就好似俾主人你鬧呀，俾新相識嘅人類朋友攬攬錫錫呀，俾其他狗望呀咁…「呀～～真係好大壓力呀！！」想幫狗狗減壓？不如試下幫佢massage啦～

輕鬆按摩七步曲

1. 開始前，主人要先叫狗狗sit down。
2. 狗狗坐好之後，主人可以先暖下自己隻手，再輕柔咁將手放喺狗狗身上。
3. 膊頭同背脊係狗狗身體最容易受壓嘅地方，主人可以先幫狗狗按壓呢啲位置大約10分鐘左右。提醒番主人先～按摩動作千祈唔好快！如果唔係，狗仔會愈按愈興奮，好想同你玩架！
4. 按完背部同埋膊頭，主人可以幫狗狗肚腩向天咁訓平。
5. 先輕輕按摩狗狗嘅肚皮，睇下狗狗會唔會反感。會嘅話，主人一定要尊重狗狗，唔好強迫佢俾你按>_<
6. 如果狗狗唔反抗，主人就可以繼續喇。主人可以將手掌放喺狗狗肚皮上，幫佢順時針慢慢打圈按摩～每打一圈大約用3－4秒左右就最「perfect池」喇～
7. 按摩嘅同時，主人可以細細聲咁同狗狗講野傾計，例如讚下佢好聽話好乖，又或者同佢講你好錫佢。唔好以為狗狗聽唔明呀，佢地聽到一定會好開心架！

牙周病三大徵狀

同大家分享左咁多牙周病嘅知識，狗主朋友們終於開始明白狗狗牙齒健康嘅重要性！其實主人們唔需要太擔心架，只要認識多左，主人就可以更加有效咁幫狗狗預防牙周病！今次等我地深入啲咁剖析牙周病嘅三大病徵啦～

1. 牙根外露、牙齒鬆動
   當狗狗嘅牙齦炎開始嚴重並且進化近成牙周病，狗狗嘅牙齦部份就會開始萎縮，牙根亦會開始外露。呢個時侯，主人仲可能會發現狗狗有牙齦出血又或者口腔潰爛嘅問題添！會唔會甩牙？會架！一旦狗狗支撐牙齒嘅牙齦萎縮，狗狗嘅牙仔就會鬆，最後就會甩牙。
2. 冇哂食慾……唔食喇！
   患有牙周病嘅狗狗牙齦已經開始萎縮，佢地點會唔牙痛呀>_< 所以患有牙周病嘅狗狗，大部份都冇乜食慾，甚至用佢地最愛嘅食物引誘佢地，佢地都唔想食！至於病情冇咁嚴重嘅狗狗雖然唔會對食物冇興趣，但佢地亦會對乾糧同一啲比較硬嘅食物表示反感。當然啦，冇食慾唔一定代表有牙周病，狗狗亦可能只係感冒！所以主人記得要留意埋狗狗有冇流鼻涕同過度流口水等等嘅感冒病徵喇！
3. 合唔埋口
   患有牙周病嘅狗狗會因為牙周發炎引起面部肥腫，而呢種不適會令狗狗合唔埋口。如果狗狗口入面嘅細菌再勁啲嘅話，狗狗牙根附近嘅組織更加會開始崩解，甚至令狗狗嘴邊嘅皮膚腐爛。

牙周病有幾可怕我諗大家都應該好清楚！所以主人們一定要幫狗狗做好日常口腔護理～除左刷牙，仲可以每日都俾狗狗食潔齒骨幫狗狗全面護齒！日常護理一定要做足～千祈唔好俾狗狗患上呢種咁可怕嘅疾病呀！

牙周病成因全面睇

隨住潔齒骨變得流行，好多主人終於開始正視狗狗嘅口腔問題，特別係牙周病！近日去狗公園行果陣就不停聽到狗主朋友講「死啦！狗狗口臭喎，一定係牙周病喇！」「狗狗啲牙咁黃，仲唔係牙周病？」唔！啱！呀！主人們！千祈唔好盲目地擔心！緊張狗狗有牙周病嘅話，首先你一定要了解牙周病嘅成因～

1. 食物殘渣未去除
   相信冇主人會否認狗狗係為食嘅動物！試諗下，狗狗每日都食咁多野，一日累積落黎佢個口入面到底會藏有幾多食物殘渣？而一旦有食物殘渣卡喺狗狗嘅牙縫，細菌就會開始滋生，最後導致牙周病>_<
2. 牙石去唔清
   好多主人都知道狗狗同我地人類一樣咁需要刷牙～但有幾多主人又真係可以做到日日幫狗狗刷一次牙呢？如果主人長時間唔幫狗狗清除佢地口入面嘅牙菌斑，牙石就會開始出現。一旦牙石開始多，狗狗嘅牙齦就會出現紅腫，最後變成牙周病>_<
3. 專業牙齒檢查冇去到
   每年主人都要帶狗狗去獸醫度接受專業嘅口腔同牙齒檢查。好多時，主人都會因為生活忙，又或者檢查費貴嘅原因唔去，但其實狗狗真係好需要每年check一次牙，俾獸醫睇下佢嘅健康狀況架！主人們，狗狗嘅健康好重要架，千祈唔好懶呀！