狗狗應節美食－搞乜鬼南瓜批

嘩嘩嘩！話咁快就過完中秋，好快就到扮鬼扮馬嘅萬聖節喇～！ 雖然香港冇乜俾狗狗同主人同樂嘅萬聖節活動，但主人想同狗狗一齊感受節日氣氛都唔係完全冇方法架～點做好？快啲趁星期六日買定材料，整一個「搞乜鬼南瓜批」，同狗狗一齊開開心心食住過萬聖節啦～

材料
牛油  45g
雞蛋  2.5隻
低筋麵粉 130g
南瓜蓉 380g
水  100g
蜜糖  15g
食用裝飾 視乎個人喜好

Steps
1. 將牛油熱溶，加入半隻生雞蛋，用筷子攪勻。
2. 將牛油同生雞蛋嘅混合物加入低筋麵粉，搓成粉團。
3. 將粉團放入批盤做批底，放入焗爐用180度焗4分鐘。
4. 將蜜糖倒入南瓜蓉，慢慢加2隻雞蛋同水，並加以攪勻。
5. 將南瓜蓉混合物倒入批底，再以180度焗15分鐘。
6. 取出南瓜批，加上主人鐘意嘅食用裝飾，大功告成！食得喇～

狗BB飲食指南

想狗狗健健康康咁成長，一定要從佢地嘅飲食開始入手。而呢樣野一定要由細開始做起～咁到底主人到底要點餵，狗ＢＢ先可以健健康康咁成長呢？一齊黎睇下三大狗ＢＢ飲食守則啦～

1. 定時定點餵食
   主人們千祈唔好唔理時間，隨時隨地睇心情餵狗狗食野！想培養狗狗良好嘅飲食習慣，主人就要每次都喺同一時間、同一地點餵同一份量嘅野俾狗狗食。而狗狗每次食完野，主人亦應該即刻收拾並清潔番狗糧盤，以保持狗狗食具清潔。
2. 每日只須８分飽
   香港好多主人都太寵狗狗，知道狗狗鍾意食野就係咁俾佢食。其實咁嘅做法係超！級！唔！啱！架！而最合適嘅份量就係俾狗狗食到８分飽～唔知狗狗點食先算８分飽？主人可以喺啱啱開始餵狗狗食野嘅時候放多啲狗糧落佢嘅狗糧盤度，睇下狗狗最多可以食幾多，再大概估量一下８分飽嘅分量就問題clear啦：）
3. 循序漸進換新糧
   狗糧分有幼犬糧同成犬糧，主人喺幫狗狗換糧嘅時候可以睇番成份同效用幫狗狗揀啱佢地食用嘅。之不過，換糧係唔可以心急架～狗主一定要有耐性，將新糧同舊糧慢慢轉換。如果你一次過將狗狗嘅野食轉哂，狗狗可能會因為唔適應而搞到腸胃不適！想狗狗開開心心變大個仔，主人要識做呢～

狗狗咬骨頭大學問

「狗狗鐘意食骨頭」呢個概念我諗連三歲小朋友都好清楚。但食骨頭對狗仔有咩好處主人又知唔知呢？原來當中有好大學問架！

1. 潔齒
   狗狗咬骨嘅時侯，骨頭會磨擦到狗狗牙齒嘅表面。而磨擦嘅過程中，狗狗牙齒表面嘅污糟野亦都會被一併磨走。而家市面上就有唔少潔齒骨品牌，例如Greenies。佢地嘅潔齒骨加入左維他命同蛋白質，幫狗狗潔齒之餘，仲一次過補充佢地需要嘅營養！主人們不妨一試～
2. 補鈣
   呢個係坊間好常見嘅講法。的而且確，骨頭有豐富嘅鈣質，所以俾狗狗咬骨頭係有補鈣功用嘅～但主人千祈唔好誤會愈硬嘅骨頭愈高鈣，其實食太硬嘅骨頭會令狗狗牙齒斷裂架！主人要小心～千祈唔好亂餵呀 >_<
3. 幫狗狗大便成型
   啱啱都講過啦～骨頭含有豐富嘅鈣質。而鈣質有助大便成型。如果你嘅狗狗平時嘅大便比較稀，比較軟身嘅話，主人不妨多啲俾骨頭狗狗咬。相反，如果狗狗本身就有排便困難嘅問題，主人就應該停止俾狗狗咬骨頭喇。

狗狗應節美食– 冰皮月餅

上次教過大家整狗狗都食得嘅傳統月餅，結果好多主人反映「天氣咁熱，我地都變哂食冰皮月餅啦～」哎呀～好啦好啦！今次就教大家整in啲嘅冰皮月餅啦！

要準備嘅材料包括：

冰皮粉            50g
葡萄糖            10g
士多啤梨        60g
蕃薯                150g
蜜糖                ½ 茶匙
粟粉                適量
脫脂奶            50g

準備好我地就可以即刻開始喇！

1. 將60g士多啤梨放入攬拌機，加入½ 茶匙蜜糖後加以攬拌。
2. 將攬拌好嘅果醬用中火煮至濃稠，再放入雪櫃冷藏5-6小時。
3. 將蕃薯去皮煮15分鐘，隔水後壓成蕃薯蓉，分成8均份。
4. 將粟粉炒至微黃色。
5. 用手拌勻冰皮粉同葡萄糖，拌勻同時加入脫脂奶搓成冰皮粉團，分成8均份。
6. 用蕃薯蓉包好果醬，搓成球狀。
7. 用冰皮包裹蕃薯蓉球，撲上粟粉，再用月餅模定型。

狗狗應節美食– 中秋蕃薯月餅

就快到中秋，相信唔少主人都想俾狗狗感受節日氣氛～講到中秋節，我地又點可以唔提起最正嘅應節食品──月餅呢？！你都想同狗狗食住月餅賞月？ 咁就要整自家製月餅，同狗狗一齊開心迎中秋啦～

請準備以下材料：

– 低筋麵粉    100g

– 橄欖油        40g

– 蛋黃汁        少許

– 蕃薯             幾個

– 紅蘿蔔 一個

準備好材料，主人們就可以開始跟住以下步驟着手整喇～

1. 將低筋麵粉同橄欖油攪拌勻，搓成月餅皮。
2. 將蕃薯煮熟，再壓成蕃薯蓉。
3. 將紅蘿蔔稍微煮熟，切成粒狀。
4. 用蕃薯蓉包住紅蘿蔔粒。
5. 喺蕃薯蓉外層包上月餅皮，放入月餅模型，壓出月餅形狀。
6. 將焗爐預熱至攝氏180度。
7. 於月餅皮面噴水，放入攝氏170度嘅焗爐焗5分鐘。
8. 拎出月餅，喺表面掃上蛋黃汁。
9. 將月餅放入攝氏160度嘅焗爐，等月餅表面焗至金黃色就可以拎出黎喇～

主人狗狗都愛吃的食物 (下)

尋日同大家介紹左4款狗狗同主人一樣咁啱食嘅食物～好多主人就同我地講「得4款，一星期一日一款都唔夠啦！」好啦好啦～今日就同大家繼續分享狗狗主人可以一齊食嘅食物啦：）

三文魚

肥美嘅三文魚含有豐富嘅脂肪酸，可以幫狗狗強化免疫系統之餘，仲可以幫佢地維持皮膚健康。相信大部份主人平時食三文魚都係生食嘅，但如果你係同狗狗一齊食嘅話，又想餵得安心，可以將三文魚煮熟先俾狗狗食架！

蘋果

唔講你唔知，原來好多狗狗都好鍾意咬蘋果嘅聲同口感架！而蘋果含有維他命A同C，對狗狗嘅健康好有益！之不過主人千祈唔好俾狗狗食到蘋果嘅果核呀，因為蘋果嘅果核含氟化物，食左會喺狗狗體內累積毒素架！

麥皮

食開嘅主人們都應該知道麥皮富有纖維素，大人小朋友都啱食，但原來狗狗都食得架～不過千祈唔好落煉奶呀～你以為對狗狗黎講會好味啲～但其實煉奶對狗狗黎講好甜，佢地嘅身體未必負擔到架>_<

青豆

低熱量嘅青豆唔單止含維他命K同C，仲有錳。如果你嘅狗狗有過重嘅跡象，就要多啲俾狗狗食青豆嘅食品啦～因為低熱量嘅青豆對維持狗狗健康體重係好有幫助架～

主人狗狗都愛吃的食物 (上)

的而且確，好多人類食得嘅食物都唔啱狗狗食用，但主人想同狗狗share野食都唔係完全冇辦法架～今次就等我介紹一啲對主人狗狗都一樣有益嘅食物俾大家認識啦：）

Yogurt
Yogurt唔單止高鈣，仲含豐富蛋白質～對狗狗黎講係非常有益架！不過買俾狗狗食嘅話記住要選擇不含糖分或者人工添加口味嘅yogurt俾狗狗食呀～
南瓜
南瓜含有大量纖維同維他命A，有助維持狗狗嘅腸道健康，可以幫助狗狗消化，對狗狗黎講好有益架！
薯仔
不論係薯波定脫水薯仔片，都含有維他命B6、維他命C、胡蘿蔔素同錳。咁平但咁有營養嘅食物仲可以點搵？多啲整俾狗狗，同狗狗一齊食啦！
雞蛋
雞蛋嘅蛋白質同核黃素原來對狗狗好有益～佢地可以幫狗狗解決消化不良嘅問題！不過俾狗狗食蛋之前，主人一定要先煮熟隻蛋，如果唔係狗狗好難吸收到入面嘅營養架～

美味狗狗潔齒骨

狗狗每日食野，牙齒都會積聚一啲牙垢，如果太耐唔處理就會有細菌，出現口腔問題。所以狗狗都要刷牙架！用潔齒骨或者潔齒餅就最方便喇！仲可以食得落肚添！

狗主只要花啲心思，就可以整到潔齒餅架啦！睇睇下面個食譜同做法啦！

材料：

黑糖： 50 克 檸檬皮： 適量 低筋麵粉： 200 克

泡打粉： 1 小匙 全麥麵粉： 100 克 蛋： 2 個

製作方法：

• 將蛋、黑糖、檸檬皮攪拌均勻
• 將低筋麵粉、全麥麵粉、泡打粉混合過篩
• 將(1)同(2)混合，攪拌成麵團
• 將麵團搓成長條狀，大約3cm厚度
• 放入焗爐，用160°C，焗30分鐘
• 拎出黎，趁熱切成2cm嘅薄片
• 再放入焗爐，用130°C焗20分鐘
• 再翻轉焗12分鐘，咁就完成啦！^_^

忙碌嘅狗主，如果冇時間自己整，又或者擔心自己整得唔夠好(太軟或者太硬會影響潔齒效果架)；狗主都可以買潔齒骨畀狗狗用架！潔齒骨揀邊隻好？有啲牌子嘅潔齒骨係經過VOHC (The Veterinary Oral Health Council)認證架，VOHC係國際獸醫牙齒保健委員會。聰明嘅你一定識揀啦！