狗狗玩樂 – 狗狗牙齒,潔齒骨,潔牙骨,狗狗護齒,刷牙

狗狗扭計，有乜計？

狗狗同小朋友都會扭計，而佢地扭計嘅方法都有相似之處，就例如偏食、唔俾主人出門口等等。咁到底狗狗扭計嘅時侯，主人可以點做呢？

唔肯出房同人玩

主人帶朋友番屋企玩，但狗狗匿埋唔肯同人玩？其實狗狗都會怕醜架～如果狗狗好怕陌生人，主人可以先同狗狗warm up，陪狗狗玩佢最鍾意玩嘅遊戲又或者玩具，再逐步叫朋友加入，咁狗狗就會慢慢接受、習慣到同人玩架喇：）要記住：對狗狗黎講，遊戲同玩具永遠都可以觸動到佢地嘅情緒架！

玩自閉

每次主人番到屋企，狗狗都會撲出黎迎接主人。但呢幾日，狗狗對你唔瞅唔睬？狗狗可能唔開心喇！呢個時侯就到主人做番主動，多啲陪狗狗哄番狗狗喇～！狗狗係好鍾意同人相處、接觸嘅寵物。狗狗唔開心嘅時侯，主人可以靜靜地陪住狗狗，摸下佢嘅耳仔、頸，又或者肚腩。透過身體接觸同陪伴，狗狗同主人會變得親密，狗狗亦會開心番！

唔俾主人出門口

主人們，有冇試過發現只要你地番到屋企，狗狗就會無時無刻跟住你地，你去邊，佢就去邊呢？係架，狗狗真係好愛你地，一秒都唔想同你地分開。狗主Edmond同我地分享過佢嘅狗狗Ball Ball甚至連工都唔會俾佢番。每當遇到呢個情況，Edmond就會用Ball Ball最愛嘅Greenies潔齒骨引開Ball Ball。直到而家，呢個方法每次都work～狗狗果然係為食嘅動物呀！^_^

狗用番皂DIY

想幫狗狗買番皂幫佢洗白白，但市面上嘅沖涼液或番皂一係就太重香精，一係就冇乜用，沖完狗狗仲係有好大陣體味？唔洗怕，想狗狗乾乾淨淨得黎，又唔會俾人工香味淹沒，方法其實好簡單：DIY！^_^

材料
椰子油    240g
橄欖油    200g
芥花籽油        120g
米油                160g
苦楝油    80g
常溫開水        265g
氫氧化納        114g

1.將氫氧化納倒入水中，不停攪拌，直至氫氧化納完全溶解水中。
2.將氫氧化納放在一旁待涼。
3.將椰子油、橄欖油、芥花籽油、米油和苦楝油倒進鍋中，並且攪勻。
4.將混合油加熱至攝氏43度，其間須用溫度計測溫。
5.當氫氧化納亦降溫至攝氏43度，將其倒進混合油中，用金屬匙加以攪勻。
6.用打蛋器攬拌混合物，直至30分鐘溶液變稠，轉至奶白色。
7.將混合物倒入定型模，用布包好，等24小時後脫模。
8.脫模之後把製成品風乾一個月。

大功告成！可以用喇～

狗狗時裝Yes or No

天氣開始轉涼，主人會唔會心郁郁想幫狗狗添衣呢？而家市面上出現左愈黎愈多又靚又有型嘅狗仔衫衫，不過，其實唔係所有狗狗都適合着衫仔架～！唔知自己隻狗狗岩唔岩着衫衫？而家就同你分析下着衫嘅好處同壞處，俾主人你分析自己隻狗狗着唔着衫好啦～

好處１：保持狗狗皮毛清潔～

之前同大家分析過，唔建議主人成日幫狗狗沖涼。不過，狗狗貪玩，成日跑跑跳跳，仲成日周地碌，好易污糟！如果有件衫仔俾佢着，狗狗喺地下碌果陣，身體就唔會直接接觸到地面，咁就可以保持佢嘅皮毛乾淨衛生啦～

好處２：保暖作用

狗ｂｂ同老人家狗狗抵抗力比較弱，亦相對起一般健康嘅狗狗怕凍。所以當天氣凍嘅時候，主人不妨幫狗狗着番件褸，幫佢地保暖之餘，亦起到預防感冒嘅作用：）

壞處１：誘發皮膚病

短毛狗狗着左衫之後，衫仔嘅布料就會直接喺狗狗嘅皮膚上摩擦。如果狗狗嘅皮膚本來就比較幼嫩同敏感，狗狗就可能會出現皮膚紅腫、敏感、甩毛、甩皮等等嘅徵狀＞＿＜

壞處２：令狗狗失去自身恆溫能力

每隻健康嘅狗狗都有天生嘅恆溫能力，識得隨住季節同溫度自我調整身體，習慣氣溫。如果主人俾衫衫佢地着，令狗狗嘅身體習慣咗外在嘅幫助，佢地就會慢慢失去身體嘅恆溫能力。

狗狗必Like生日禮物

狗狗生日係每年一度最令主人頭都爆嘅日子，送野食又覺得自己冇誠意，送玩具又怕狗狗唔鍾意。呀～～～好頭痕呀！！不過，由今日開始主人再唔需要怕喇！因為我幫大家搜羅左3樣狗狗必like嘅生日禮物～仲諗？快d喺下面揀番樣送俾狗狗啦！

狗狗必Like禮物第3位 : 潔齒骨

成日聽人講「牙痛慘過大病」，其實呢句野唔係淨係啱用喺我地人類身上架！狗狗嘅牙齒健康其實都非常重要！狗狗生日，主人一定會安排好多美食俾狗狗食，同佢慶祝。但食完咁多正野，狗狗嘅牙齒就受罪喇！細心嘅主人記住買有認證嘅潔齒骨俾狗狗做生日禮物，等狗狗食完美食都可以keep住牙齒靚靚仔仔、健健康康！

狗狗必Like禮物第2位 : 玩具波

波波係狗狗玩具界之中最受歡迎嘅玩具之一。狗狗鍾意一啲表面唔光滑，方便狗狗咬起嘅波波～如果呢啲波波咬起黎有聲，狗狗就更鍾意喇！趁狗狗生日，買個佢一定鍾意嘅波波同佢地玩啦！

狗狗必Like禮物第1位 :主人

其實主人你嘅陪伴對狗狗黎講就係最好嘅生日禮物。試諗下你平時番工會用幾多時間陪狗狗？每日你放工番到屋企，換件衫食一食飯，玩一陣電腦就訓覺，而狗狗就只可以望住你行黎行去，直至你訓為止。唔好再留低狗狗自己一個喇！其實狗狗好鍾意好鍾意同你玩架主人！快d拎埋狗狗最鍾意嘅玩具，陪佢玩番一日，享受快樂嘅相處時間啦！

狗狗秋季旅行熱門地點

食完月餅、放完中秋假就代表我地正正式式入秋喇～趁住秋高氣爽，主人們緊係要多啲帶狗狗出去玩啦～今次就同大家分享一啲適合狗狗同主人一齊去玩嘅公園，等你地同狗狗一齊去個開開心心嘅秋季旅行啦：）

蝴蝶谷道寵物公園

成日聽到大型狗狗嘅主人投訴香港嘅寵物公園太細，山長水遠入到去，狗狗跑兩步就遊完成個公園。你都有呢個煩惱？咁今次介紹嘅公園就啱哂你同狗狗喇～事關呢個公園佔地總共７０００平方米，號稱全九龍最大！仲有好多俾狗狗玩嘅遊樂設施添～啱哂好動嘅狗狗！

地址：深水埗蝴蝶谷道２號

交通：荔枝角站C出口（步行前往約１０分鐘）

開放時間：星期一至日及公眾假期０７００－２２００

查詢電話：２３８６０９４５

彭福公園

彭福公園佔地８００００平方米，係城市中嘅綠洲。公園入面除左有人工湖之外，仲有用草木堆砌嘅植物迷宮～絕對係一個適合一家大細帶埋狗狗一齊去玩嘅公園～！如果主人鍾意幫狗狗影靚仔相嘅話，呢個公園更一定會成為你地嘅至愛～因為入面有好多生長得好靚嘅花花草草同樹，加埋可愛嘅狗狗，點影都靚！

地址：新界沙田馬場

交通：火炭站Ｃ出口；沙田站Ｂ出口轉乘新界專線小巴６０Ｒ
開放時間：逢星期二、五及夜馬翌日　１０１５－１８００

逢星期三、四、六、日　　０９００－１８００
逢賽馬日及星期一關閉

狗狗應節美食– 中秋蕃薯月餅

就快到中秋，相信唔少主人都想俾狗狗感受節日氣氛～講到中秋節，我地又點可以唔提起最正嘅應節食品──月餅呢？！你都想同狗狗食住月餅賞月？咁就要整自家製月餅，同狗狗一齊開心迎中秋啦～

請準備以下材料：

– 低筋麵粉 100g

– 橄欖油 40g

– 蛋黃汁少許

– 蕃薯幾個

– 紅蘿蔔一個

準備好材料，主人們就可以開始跟住以下步驟着手整喇～

將低筋麵粉同橄欖油攪拌勻，搓成月餅皮。
將蕃薯煮熟，再壓成蕃薯蓉。
將紅蘿蔔稍微煮熟，切成粒狀。
用蕃薯蓉包住紅蘿蔔粒。
喺蕃薯蓉外層包上月餅皮，放入月餅模型，壓出月餅形狀。
將焗爐預熱至攝氏180度。
於月餅皮面噴水，放入攝氏170度嘅焗爐焗5分鐘。
拎出月餅，喺表面掃上蛋黃汁。
將月餅放入攝氏160度嘅焗爐，等月餅表面焗至金黃色就可以拎出黎喇～

狗狗Massage大法

「你有壓力，我有壓力！」其實狗狗都有壓力架！雖然睇起上黎，狗狗好似日日都只係需要訓同食咁，但原來佢地都有壓力來源架～就好似俾主人你鬧呀，俾新相識嘅人類朋友攬攬錫錫呀，俾其他狗望呀咁…「呀～～真係好大壓力呀！！」想幫狗狗減壓？不如試下幫佢massage啦～

輕鬆按摩七步曲

開始前，主人要先叫狗狗sit down。
狗狗坐好之後，主人可以先暖下自己隻手，再輕柔咁將手放喺狗狗身上。
膊頭同背脊係狗狗身體最容易受壓嘅地方，主人可以先幫狗狗按壓呢啲位置大約10分鐘左右。提醒番主人先～按摩動作千祈唔好快！如果唔係，狗仔會愈按愈興奮，好想同你玩架！
按完背部同埋膊頭，主人可以幫狗狗肚腩向天咁訓平。
先輕輕按摩狗狗嘅肚皮，睇下狗狗會唔會反感。會嘅話，主人一定要尊重狗狗，唔好強迫佢俾你按>_<
如果狗狗唔反抗，主人就可以繼續喇。主人可以將手掌放喺狗狗肚皮上，幫佢順時針慢慢打圈按摩～每打一圈大約用3－4秒左右就最「perfect池」喇～
按摩嘅同時，主人可以細細聲咁同狗狗講野傾計，例如讚下佢好聽話好乖，又或者同佢講你好錫佢。唔好以為狗狗聽唔明呀，佢地聽到一定會好開心架！